Қазақтелеком компаниясы жұмысшыларын жаппай дәрігерлік тексеруден өткізуді бастады. Биыл 18 мыңға жуық қызметкер өз денсаулығын тексереді, деп хабарлайды ozgeris.info сайты.
Дәрігерлер еліміздің барлық аймағындағы 206 елді мекенді аралайды. Олардың қатарында ірі қалалар да, аудан орталықтары мен шалғай ауылдар да бар. Алыс аймақтардағы жұмысшыларға жету үшін үш жылжымалы медициналық кешен бөлінді.
Мұндай шара еңбек заңнамасына сай міндетті түрде өткізіледі. Бұл ұйымдағы қауіпсіздік пен еңбекті қорғаудың басты бөлігі саналады. Тұрақты тексеру қызметкерлердің денсаулығын уақытылы бағалауға көмектеседі. Қандай да бір ауру қаупі болса, оның дер кезінде алдын алуға жол ашады.
Компанияның өндірістік қауіпсіздік дирекциясының басшысы Нурия Муфтеева бұл жұмыстың маңызын түсіндірді. Оның айтуынша адам денсаулығына қамқорлық жасау мекеме үшін ең басты қағида. Қызметкердің қай жерде жұмыс істейтіні маңызды емес. Бастысы әрбір адам толықтай медициналық бақылаудан өтуі тиіс. Осылайша ұжымда қауіпсіз еңбек мәдениеті қалыптасады.
